يا ليلى ليلك جنَّ
من طرف خدام النبي محمد صلى الله عليه وسلم azhr158
بسم الله الرحمن الرحيم
قصيدة الشاعر المكاوي تلميذ الشيخ عبد المحمود نور الدائم في مدح سيدنا الغوث الشيخ أحمد الطيب البشير
يا ليلى ليلك جنّ ** معشوقك أوّه وأنّ
أم مرحي فوق جبلنا ** أصلو الإكسير معدنا
السر بالكوب والشنه ** كل الغشاهو تهنّا
*******
مطر الفيوض ما ونَّّى ** ونبعن سروف الجنه
تربالنا سامر وغنى ** عنََّج رقابو تحنّا
********
لي خدمتو إتشهلنا ** وخلفن دناقر الطنه
بي همة ما بطلنا ** كالرمشة ما تعطلنا
*******
فرسانو حولو يدوروا ** ناس ود علي المنبورو
يعقوب والمصري حبورو ** بله اب حجول والنورو
*******
خدموهو لبسو شرايطو ** وكل زول فرش سرايتو
عدد السبعين مضرايتو ** صبروهو وعلو رايتو
********
هبَّّ وطلق نسّامو ** نبّه للأمة وسامو
وقف البصير قسامو ** والقرشي طابقه اسهامو
********
التوم الفي عزازو ** بي إشارة من عزازو
وصلو وملك ميجازو ** مفتاح الشونة حازو
********
خلفن دناقر عزي ** يا قوم الطيب هزي
جاب لي البيهم عزي ** بشرى وشيخون الوزي
********
الطيب سيد من سادو ** كم أصلح الفسادو
الفي سلانج صلحلو فؤادو ** تت والدويحي أولادو
********
طيبا وسيلتي وكابي ** مهما أقول في صوابي
النادر عودو نابي ** في أولادو الصابونابي
*********
العلماء والصوفية ** أب عمة وأب كوفية
ثابتين لك الخاصية ** يا سيد ود أب صفية
*********
راجل القويز عبد الله ** نفسو وقرينو ذلّ
بي كاس الطيب علّ ** جاب الأسد في الحلة
*******
الشيكيتابي الفي غروبو ** والصليحابي المهيوبو
ود مكي والمجذوبو ** أسقاهم صافو كوبو
********
فيضك نزل هطّالو ** حسيب ود طه ابطاله
من كاسك السطّالو ** شربو بي طولك طالوا
********
الشيخ مصطفي عركينا ** شوف قسمتو وتمكينا
من الرسول سيركينا ** ياتو البجي يحاكينا
*******
الدايرنا والمابينا ** ثابت فضايلو ابينا
ذو قربى عن نبينا ** كفى نفلو الفي المدينة
*******
قام من طبية أم منارة ** في اخميم دخل بي اشارة
ذكر القلل بي عبارة ** وعشر تالاف سكارا والعلماء اندهشوا حيارى
*********
اتوجه مصر المعلومة ** وجاتوا الثقات بي علومها
الأربعين عيزومة ** اتجزأ وفى لزومها
*******
في مصر سوّ بيانه ** واتوجه لي سودانو
جوهو الخلوق يتدانوا ** رووا من دنانو وزانوا
*********
في ام مرحي دقََّّ ساسه ** عم البلد انفاسه
احيى البقع بي كاسه ** جاحد الفضل شن باسو
********
شيخ النقل في زمانه** بيعطي المدد لي الآن
والجاهو من عربانو ** حالا سقى القرآنُ
*******
جوهو الخلوق من درو ** لا تصمدوا ولا فروا
للطيب في مقرو ** اسقاهم صافي دره
********
محمود لي قومو روَىّ ** واشرق كضحي ضوّ
فوق الأمانة اطوّ ** ابن البسوي وسوّى
********
الصلاه والسلام ما لاحا ** برقا ونسيما فاحا
تلثم ضريح مصباحا ** يجد المكاوي رباحا